घोराही सिमेन्टले छलछाम गरी महंगो मूल्यमा सर्वसाधरणलाई सेयर भिडाएको खुलासा, यसरी देखाएको थियो नाफा

काठमाडौ । पछिल्लो समय उद्योगहरुले नाफामा लगातार बृद्धि भएको कागजी विवरण देखाएर महंगो मूल्यमा आईपिओ जारी गर्ने गरेको खुलासा भएको छ ।  

Advertisement:

आइपिओ जारी गर्नुअघि एक खालको वित्तिय विवरण देखाउने ती कम्पनीको आइपिओ जारी पश्चात लगातार वित्तिय विवरण खस्किएको प्रतिवेदन सार्वजनिक हुने गरेको छ । यसको उदाहरण हो घोरही सिमेन्ट । केही समय अघि महंगो मूल्यमा सेयर जारी गरेको घोराही सिमेन्टले पनि छलछाम पुर्वक नाफा देखाएर सर्वसाधारणलाई महंगो मूल्यमा सेयर भिडाएको खुलासा भएको छ ।

घोराहीले प्रति सेयर ३३५ प्रिमियम थप गरी प्रति सेयर ४३५ का दरले ७९ लाख ४३ हजार ८०१ कित्ता सेयर बेचेको थियो । उक्त सेयर जारी गर्नुपुर्वक घोराहीले नेपाल विद्युत प्राधिकरणलाई तिर्नुपर्ने महसुल १ अर्ब २४ करोड १३ लाख र कर दायित्व  १ करोड ४८ लाखसमेत गरी १ अर्ब २५ करोड ६१ लाख २०७८. ७९ मा कन्टिन्जेन्ट दायित्वतर्फ देखाई खर्च नियोजनबाट उद्योग नाफामा देखाएर प्रिमियममा सेयर निष्कासन गरेको पाइएको छ । जसलाई  सरकारी निकायको लेखापरिक्षण गर्ने (अडिट) सँस्था महालेखा परिक्षकको कार्यालयले औचित्यहिन भनेको छ  । जबकी धितोपत्रको प्रारम्भिक निष्कासन धितोपत्र दर्ता तथा निष्कासन नियमावली, २०७३ को नियम २५ अनुसार प्रिमियममा धितोपत्र निष्कासन गर्दा प्रिमियम मूल्य निर्धारण गर्ने विधि र औचित्य पुष्टि हुनुपर्ने व्यवस्था छ । तर यस कम्पनीले भने कर्मचारीलाई सामाजिक सुरक्षा कोषमा आबद्ध गरी उद्योगको तर्फबाट खर्च लेख्नुपर्नेमा कोषमा आबद्ध नगरी तथा ह्रास खर्चसमेत न्यून लेखी नाफामा वृद्धि गरेको देखिएको छ । घोराहीले लगानीकर्तालाई यस्तो अन्याय गरेको भन्दै नागरिकमा परेको प्रभावको छानविन गर्न महालेखाले नियामकलाई भनेको छ । 

घोराहीले २०८० जेठमा सेयर जारी गरेको थियो ।  जसमा सामुहिक लगानी कोष, बैदेशिक रोजगारमा गएकाहरुलाई, आयोजना प्रभावित र कर्मचारीलाई बाडेर बाँकी रहेको कुल ६९ लाख ११ हजार ६७० कित्ता सर्वासाधारणलाई बिक्रि गरेको थियो । सेयर जारी गरेयता लगातार घाटामा गएको सिमेन्ट  चालु आर्थिक वर्षको (२०८१/०८२) तेस्रो त्रैमाससम्म ५५ करोड ४३ लाख रुपैयाँ खुद घाटा व्यहोरेको छ । कम्पनीहरुले सर्वसाधारणलाई आइपीओ जारी गरेपछि घाटामा गएको रिपोर्ट सार्वजनिक गर्न थालेको हो । आजको दिनमा (सोमबार जेठ ५) यसको सेयर मूल्य ४९६ रुपैयाँ छ । 

प्रतिष्ठित व्यावसायिक घराना त्रिवेणी र विशाल ग्रुपको लगानीमा सञ्चालित घोराही सिमेन्ट इन्डस्ट्री लिमिटेडले आइपिओ जारी गर्नुअघि निकालेको  तीन वर्षको प्रक्षेपित वित्तिय विवरणमा लगातार नाफामा जाने भनिएको थियो । त्यतिबेला आर्थिक वर्ष २०८१÷८२ मा उद्योगको खुदनाफा ९७ करोड ६३ लाख रुपैयाँ पुग्ने अनुमान गरिएको थियो । नाफा वृद्धिसँगै उद्योगको प्रतिसेयर आम्दानी पनि बढ्ने भनिएपनि चालु आर्थिक वर्षको तेस्रो त्रैमाससम्म आइपुग्दा कम्पनी ५५ करोड घाटामा छ । अहिले यसको प्रतिसेयर आम्दानी १२.१४ रुपैयाँ ऋणात्मक छ । जबकी सेयर जारी गर्नुपुर्व २४.५८ रुपैयाँ पुग्ने अनुमान उद्योगको थियो।

घोराहीले नवलपरासी सुनवल नगरपालिका-९ मा उद्योग स्थापनाका लागि उद्योग विभागबाट २०७८ कात्तिक २३ मा घोराही सिमेन्ट इन्डस्ट्री लिमिटेड, सिमेन्ट प्याकेजिङ–१ नामक उद्योग स्वीकृति गरेको थियो ।