सरकारले यसरी जुटाउँदैछ कर्मचारीलाई दिने तलब तथा भत्ता, महंगी भत्ताका लागि मात्र पौने ११ अर्ब बढी भार थपियो

काठमाडौ । आफ्ना कर्मचारीलाई तलब तथा भत्ता खुवाउँन  पनि स्रोतको दबावमा पर्ने सरकारले आगामी आर्थिक वर्ष  (२०८२/०८३) आफ्ना कर्मचारीलाई खुवाउँने तलब तथा भत्ताको लिस्ट सार्वजनिक गरेको छ । 

सरकारी कर्मचारी र विभिन्न पदाधिकारीलाई दिइने तलब तथा विभिन्न शिर्षकको भत्ता जुट्ने स्रोत अर्थमन्त्रालयले बजेटमा स्पष्ट पारेको छ । सरकारी कर्मचारी तथा विभिन्न पदाधिकारीको तलब तथा भत्ताका लागि सरकारले आगामी आर्थिक वर्ष २०८२/८३ मा १ खर्ब ७६ अर्ब ६३ लाख रुपैयाँ छुट्याएको छ  । 

Advertisement:

आर्थिक वर्ष २०८०/८१ म १ खर्ब ५२ अर्ब ३७ करोड ३८ लाख रुपैयाँ कर्मचारीको पारिश्रमीक र सुविधामा खर्च भएको थियो  । तर चालु आर्थिक वर्ष २०८१/०८२ मा १ खर्ब ५४ अर्ब ६८ करोड ५५ लाख खर्च हुने अनुमान छ भने आगामी वर्ष यो दायित्व झनै बढेर १ खर्ब ७६ अर्ब बढी खर्च गर्ने लक्ष्य सरकारको छ ।  आगामी आवमा कर्मचारीको परिश्रमीकका लागि मात्र १ खर्ब २७ अर्ब ५३ करोड १३ लाख रुपैयाँ छुट्याएको छ । संवैधानिक निकायका विभिन्न पदाधिकारीका लागि २ अर्ब ६ करोड ७६ लाख रुपैयाँ तलब छुट्याएको छ । 

यस्तै सरकारी कर्मचारीको पोशाकका लागि ४ अर्ब ९४ करोड ८८ लाख रुपैयाँ, खाद्यान्नका लागि १७ अर्ब ४३ करोड ५२ लाख रुपैयाँ,औषधी उपचार खर्च २ अर्ब ३९ करोड ९१ लख रुपैयाँ छुट्याएको छ । यस्तै स्थानीय भत्ता १ अर्ब २० करोड ८५ लाख रुपैयाँ छुट्याएको सरकारलाई १७ अर्ब १ करोड बढी महंगी भत्ताको भार थपिएको छ । सरकारले आगामी आवको बजेटमार्फत कर्मचारीको महंगी भत्ता बढाएर ५ हजार पुर्याएको छ । 
अघिल्लो वर्ष (२०८०/८१) सरकारले महंगी भत्तामा ५ अर्ब ६७ करोड ८८ लाख रुपैयाँ खर्च गरेको थियो भने चालु आवमा (२०८१/०८२) मा ६ अर्ब १७ करोड ९ लाख रुपैयाँ खर्च हुने संसोधित अनुमान छ । तर सरकारले महंगी भत्ता बढाइदिएपछि राज्यलाई १० अर्ब ८४ करोड ६ लाख रुपैयाँ अतिरिक्त भार थपिएको छ । फिल्ड भत्ता १ करोड ५३ लाख, कर्मचारीको बैठक भत्ता २५ करोड ३३ लाख, कर्मचारीलाई प्रोत्साहन र पुरस्कार दिन ५४ करोड ४ लाख रुपैयाँ छुट्याएको छ ।  यस्तै कर्मचारीलाई विदेश भ्रमणमा जादा दिइने भत्ताको लागि १ अर्ब २ करोड ४३ लाख रुपैयाँ र अन्यभत्ता १ अर्ब ८१ करोड ७२ लाख रुपैयाँ बजेट विनियोजन सरकारले  गरेको छ । 

कर्मचारीको सामाजिक सुरक्षाको लागि तीन अर्ब २६ करोड ८२ लाख रुपैयाँ छुट्याएको सरकारले कर्मचारीलाई पानी तथा विजुली र सञ्चार खर्च मात्र ४ अर्ब ५२ करोड ७६ लाख रुपैयाँ छुट्याएको छ । 

कर्मचारी र विशिष्ट व्यक्तिको भ्रमण खर्चलाई करिब साढे ३ अर्ब
सरकारले बजेटमै सरकारी कर्मचारी र विशिष्ट व्यक्तिलाई भ्रमणका लागि ३ अर्ब ४५ करोड ७५ लाख रुपैयाँ बजेट राखेको छ ।
सरकारका कर्मचारी र विशिष्ट व्यक्ति तथा कर्मचारीले भ्रमण गर्दा हुने खर्च पनि बर्षेनी बढ्दो देखिन्छ । अघिल्लो आर्थिक बर्ष (२०८०/०८१) यस शिर्षकमा २ अर्ब ७५ करोड ८० लाख रुपैयाँ खर्च भएको थियो । चालु वर्ष (२०८१/०८२) ३ अर्ब २६ करोड १३ लाख रुपैयाँ खर्च हुने संसोधित अनुमान छ । 

तर आगामी बर्ष भने यस्तो खर्च बढेर ३ अर्ब ४६ करोड ७५ लाख रुपैयाँ पुग्ने भन्दै सरकारले उक्त रकम बजेटमा राखेको छ । सरकारले यी खर्चहरु राजस्वबाट हुने आम्दानी र  वैदेशिक सहयोगबाट जुटाउँने बताएको छ । यद्यपि आन्तरिक ऋण भने यस्ता खर्चहरुमा प्रयोग नगरिने अर्थमन्त्रालयले भनेको छ । यता कर्मचारीको तालिम, सिप विकास, जनचेतान गोष्ठी तथा सेमनिारका लगायत विभिन्न कार्यक्रमका लागि १८ अर्ब ३९ करोड ८० लाख रुपैयाँ छुट्याएको छ ।  यो खर्च पनि बढ्दो क्रममै देखिएको छ । 
सरकारले राजस्वबाट आगामी बर्ष १३ खर्ब १५ अर्ब रुपैयाँ उठाउँने लक्ष्य लिएको छ भने वैदेशिक अनुदानबाट ५३ अर्ब ४५ करोड र वैदेशिक ऋणबाट २ खर्ब ३३ अर्ब उठाउँने लक्ष्य लिएको छ । यिनै स्रोतहरुबाट सरकारले यस्ता खर्चहरु जोहो गर्नुपर्ने हुन्छ ।