.jpg)
२०८३ जेठ २० गते
नेप्सेमा झिनो अङ्कको वृद्धिसँगै कारोबार रकम पनि बढ्यो
२०८३ जेठ २० गते
काठमाडौँ। बुधबार नेपाल स्टक एक्सचेञ्ज (नेप्से) परिसूचक सामान्य सुधारसहित बन्द भएको छ। मंगलबारको सकारात्मक लयलाई निरन्तरता दिँदै बजार यस दिन २.६६ अंकले उकालो लागेर २,७८०.२५ विन्दुमा पुगेको हो।
Advertisement:
बजार परिसूचकसँगै कारोबार रकममा पनि वृद्धि भएको छ। अघिल्लो दिन ५ अर्ब २६ करोड रुपैयाँ बराबरको कारोबार भएको बजारमा बुधबार ३४७ कम्पनीका १ करोड ३५ लाख २१ हजार कित्ता शेयर ६२ हजार १४८ पटक किनबेच हुँदा कुल कारोबार रकम ५ अर्ब ७३ करोड ८१ लाख रुपैयाँभन्दा बढी पुगेको छ।
दिनभरको कारोबारमा कालिञ्चोक हाइड्रोपावरको शेयर सकारात्मक सर्किट लेभलमा पुगेको छ। कम्पनीको शेयर मूल्य ७४ रुपैयाँ ७० पैसाले बढेर ५७२ रुपैयाँ ९० पैसामा अन्तिम कारोबार भएको छ। यस्तै, ८.५ प्रतिशत एसबिएल डिबेञ्चर २०८४ को मूल्य झण्डै १५ प्रतिशतले उकालो लाग्दा विजय लघुवित्त वित्तीय संस्थाको शेयर मूल्य पनि ८.५ प्रतिशतभन्दा बढीले बढेको छ। यता, नेपाल पुनर्बीमा कम्पनीको शेयर मूल्य भने ५.१८ प्रतिशतले घट्दै दिनको सबैभन्दा बढी गिरावट हुने कम्पनीमध्ये परेको छ।
कारोबार रकमका आधारमा आँखुखोला जलविद्युत कम्पनी लगातार अग्रस्थानमा रह्यो। कम्पनीको शेयरमा मात्रै ४४ करोड २३ लाख रुपैयाँभन्दा बढीको कारोबार भएको छ। नेपाल पुनर्बीमा कम्पनीको करिब २२ करोड रुपैयाँ बराबरको शेयर किनबेच हुँदा रिडी पावर कम्पनीको कारोबार पनि २० करोड रुपैयाँ नाघेको छ।
उपसमूहगत प्रदर्शन हेर्दा १३ मध्ये ७ उपसमूह हरियालीमा बन्द भएका छन् भने ६ उपसमूह घटेका छन्। निर्जीवन बीमा उपसमूह सबैभन्दा बढी ३.३७ प्रतिशतले उकालो लाग्दा जीवन बीमा उपसमूह पनि १.५ प्रतिशतभन्दा बढीले बढेको छ। विपरीत रूपमा, अन्य उपसमूह २.३६ प्रतिशतले घट्दै सबैभन्दा बढी दबाबमा देखिएको छ।
प्रतिक्रिया